वर्षायामसँगै लामखुट्टेको प्रकोप बढ्ने गर्छ । लामखुट्टेको टोकाइबाट छालामा रातो दाग, चिलाउने तथा असहजता हुने भएकाले धेरै मानिस हैरान हुने गरेका छन् । लामखुट्टेबाट बच्न घरको सरसफाइसँगै केही घरेलु उपाय पनि अपनाउन सकिन्छ ।
पुदिनाको गन्ध लामखुट्टेलाई मन नपर्ने भएकाले घरको कुनामा पुदिनाका पात राख्न सकिन्छ । त्यस्तै, लसुनको रसलाई पानीमा मिसाएर घर वरपर छर्कने उपाय पनि अपनाइन्छ ।
तुलसीका पात घर वा कोठामा राख्दा यसको गन्धले लामखुट्टे कम गर्न मद्दत पुग्न सक्छ । नीमका पात पनि परम्परागत रूपमा लामखुट्टे भगाउन प्रयोग गरिन्छ ।
यद्यपि, यी घरेलु उपायको प्रभाव व्यक्ति र वातावरणअनुसार फरक हुन सक्छ । लामखुट्टे नियन्त्रणका लागि घर वरपर पानी जम्न नदिने, झ्याल–ढोकामा जाली लगाउने र आवश्यक परे प्रमाणित लामखुट्टे नियन्त्रण सामग्री प्रयोग गर्नु प्रभावकारी उपाय मानिन्छ ।
